Bulang ni kite pose
seme bende kene jage
tingkah laku juge kate
jangang duk suke ngate
kekgi tamboh dose

Bulang ni kite pose
taing gi beli makanang segale
jangang bazir belanje
kekgi taing buke
dok abih tohok buang saje

Bulang ni kite pose
kalu masok banyok pung dakpe
sedekoh sikek ke jirang kite
buleh jugok tangboh pahale
dok rugi sikek pung pade kite

Bulang ni kite pose
masuk garek kite buke
makang kuih teranung kite
sedak sangak sapa lupe
sapa seeh perut pening pale
waktu garek nok abih doh le
dok dang starang kejor mase
solat garek abih gitu aje

Bulang ni kite pose
Kerja kuak macang biase
cari rezeki hok halal belake
jangang tidur sebak ngantuk mate
pose pose gok, kije kene buak dokleh buang mase
jangang lepak duk ngate orang kiri kanang kite
Malaikat duk catat kire
setiap amalang kite
ingatlah ini bulan pose
tapi kene ingat sokmolah kite
bukan bulan pose saje
hari laing bulang laing pun kene jage-jage
hidup buat baik orang pun suke ke kite


Bulang ni kite pose
lepah buke kite gi balai soh masjid kapong kite
jemaah rama geng-geng kite
penuh masjid buat tarawih ikut imam kite
pahtu jangang lupe
bayor zakat fitrah ke amil-amil kite
jangang sapa lepah raye
awal Ramadhan sapa sebelum solat raye
buleh bayor takdok hal buleh belake
tapi ingak jangang selepah raye


Bulang ni kite pose
sapa abih bulan pose
kite raye
pakai serba baru belake
tamboh pahale
mari kite bergembire
same-same keluarge kite
sanak saudara kerabat keluarge
mitok maaf ampun segale
atah dose kalu terbuat terkate
budok-budok pulok suke pitih raye
makang sikek kuih tunggu tuang rumah bui sapo raye
pah dapak gi rumoh laing pulok doh cepatnye
dok dang dok dang salang teruh turun tanoh cepat jalanye
tulah budok-budok kite
Ape-ape pung kite jupe
Bulan Ramadhan tahun depang pule...